Sharmeeli Si Wo Dhoop

Sharmeeli si wo dhoop
Khidki se jhaank rahi hai
Apni parchhayi ko
Jo kushaada hai mere kamre ke farsh par
Din dhalne ko hai
Par wo dhoop bhi ziddi hai
Apni parchhayi ko lekar hi jaayegi
Le jao phir agar itna hi mann hai
Par kal phir tumhein yahaan aana hai
Phir mere kamre ke farsh par
Aake baith jaana hai
Din dhal gaya hai aur dhoop chali gayi hai
Raat ka wo peher bhi ab ghar laut gaya hai
Par wo dhoop phir dobaara nahin dikhi mujhe
Shaayad naraaz ho gayi hai mujhse