Woh waqt hi alag tha, school wala! Karne ke liye bas padhai thi, aur darne ke liye bas papa ki daant. :) Kya sahi time tha, kasam se. Aur intezaar hota tha bas garmi ki chhutiyon ka!Kab chhutiyaan hongi, kab naani ke ghar jaenge.
Ab toh OMG, possible hi nahi hai wahan rehna because no net connection, no electricity, aur toh aur shayad pani bhi thik se aur time pe na mile. That is possible my friend, kyuki purane kuye sookh gaye hain, naye bane nahi kyuki zaada koi log hi nahi hain wahan. Woh bhi sheheron ki taraf nikal gaye hain. Anyway, yahan pe there's no point talking about the pros and cons of living in a gaanv(I know I've listed only cons so far :P)!
But just to say ki jab main last time gayi thi toh ek din se zaada rehna mushkil ho gaya tha. All because of no connectivity.
But tab, aisa koi naatak hi nahi tha! Tab laptop toh kya, apna khud ka phone hi nahi tha. And that is how tab itna lamba time wahan aaram se nikal jaata tha. Ek mahina bhar. Hum pehle train se jhansi jaate the, fir wahan se bus se gaanv ke paas ke kasbe tak 3 ghante me pahuchte the. Wahan maama(joh gaanv me hi rehte hain), tractor lekar aate the. Gaanv me hamare khet hain, so tractors aur harvesters bhi hain. Bike pe maama ke pichhe mummy aur meri chhoti behen, aur tractor me driver k saath main aur mera bhai! Aur haan itni badi trolley me hamara samaan! :D 15 min ki duri par hi gaanv tha, but kisi roller coaster se kam nahi hoti thi woh tractor ki ride! Kyuki raasta kharab tha, bohot tedha-medha aur chhote chhote gaddhon se bhara hua. Ek baar hum dono trolley me baith ke aaye, OMG joh pait dukha tha uske baad! Pura system hi hil gaya tha andar se, jaise pancreas aur small intestine aapas me jagah swap kar liye hon aur large intestine kisi saanp ki tarah muh se baahar aane wala ho!
Gaanv ka ghar kaafi shaandaar hai, hawelinuma. Pahunchte hi sabse pehle baahar ek lakdi ki chair pe bade babbaji yaani mummy ke daadaji baithe dikhte the. Woh kaafi lambe-chaude the, Amitabh Bachchan se bhi zaada aur kaafi healthy apni age ke hisaab se. Kuchh waisa hi unka andaaz tha, authority wala(Jaise woh jahan khade honge line wahin se shuru hogi type :D).Unhe kuchh sunai nahi deta tha, isliye zor se chilla kar baat kia karte the. Har baar puchha karte the, "tum baby ki maudi aa ho?". Baby meri maa ka pet name aur woh humse confirm karte the ki hum unke bachche hain na, bundelkhandi me. Kyuki come on, at 96 you know people do not remember their own names sometimes!
Unke just pichhe mere nanaji, aake hum sabke paanv chhute the(kyuki bundelkhand me ladkiyon k paanv chhune ka yeh kharab sa riwaaz hai).
Aur unke just pichhe ghunghat se apna sar dhanke hue(kyuki bade babbaji unke sasur the), dunia me meri sabse favorite, meri naani. Ek taambe(copper) ke lote me paani leke hamare sar ke upar chaaron taraf ghuma kar fir andar aane deti thi. Woh kya hai mujhe nahi pata, but I used to be fascinated by it all. Andar jaake bada sa baramada aur uske bhi andar maami chai/sharbat banati huin. Bich me bada sa aangan, aangan me chulha. jiska use shaam ko hi hota tha kyuki gas cylinder-chulha andar the jahan shaam ko garmi lagti thi! Beesiyon kamre honge us ghar me!
Subah din ki shuruwaat 5 baje hi ho jaati hai wahan. Kyuki chhat pe sote hain, toh suraj ugte hi nind khul jaati hai! Fir niche pahuch ke brush, etc karne ke baad doodh/chai peena chulhe pe bani hui. Ghar ki gaaye-bhainson ka doodh hota tha. Alag hi taste hota tha usme! Horlicks aur Bournvita se kya doodh tasty banega! Fir ghar me naukar aane lagte, safai karne. Itne bade ghar ki safai khud akele toh possible nahi thi. Hum bachche curiosity se sab kuchh dekha karte. Kaise woh jaanwaron ko pani dete hain, kaise doodh nikalte hain, fir kaise unhe kholke neher k kinaare le jaate hain. Unke waapas aane ka time bhi nishchit hai, shaam k chaar baje k aas paas! Jaanwar dusre ghar me bandhe hain, obviously. Jiske baaju me ek bagiya bhi thi. Wahan sabjiyaan aur jangli phool lage the. Aur wahan hai ek bada sa aam ka ped. Actually wahan teen bade bade ghar hain, kyuki bade babbaji k teen bete hain. Par do ab wahan rehte nahi hain. Toh ek me joh kheti se anaaj aur daalein hoti hain, woh store ki hui hain. Aur dusre me jaanwar bandh gae hain. Hum dopeher me khana khane k baad nani k saath let jaate. Aur woh roz ek kahaani sunati thi, kuchh gaa k bhi :) Fir kuchh der baad woh so jaati, aur hum uth ke dusre ghar(jahan jaanwar bandhe hain) chale jaate! Wahan se bore hue, toh joh itne saare kamre hain ghar me unko ghumne lagte. Ek kamre me purane zamane ki photos mili, bade babbaji ki jawani ki. Baap re, kya kahein, waisa ro-aab dekha nahi kahin. Aur wahin kone me rakhi hui thi ek talwaar, jang khai hui. Uthaya toh bohot bhari thi, dekhne se utni nahi lagti thi. Is ghar me jab ghum chuke hote toh dusre do gharon ke kamron ko ghumne nikal padte. Jis ghar me anaaj, daalein rakhi hui thi, wahin upar chadhke teesri manzil pe thi laal kothi. Wahan pahunchna toh jaise bhool bhulaiya tha! Kyuki kis seedhi se gae the pata nahi laga tha(aur andar se woh usi tarah dikhta tha jaise Monjolika ka kamra!) , baad me nikalte time har seedi waapas laal kothi me hi le aati. Almost ro diya tha us din toh! Fir dekha khidki hai andar kothi ke, khola aur aawaaz di. Nani ne sun liya aur aa gayin humein lene! Itna relief hua tha us din unko dekhke! Aise hi dopeher nikal jaati. Naani Sooraj ki padhti chhaanv ko dekhke correct time bataati thi, fir hum use ghadi dekhkar confirm karte the!
Shaam ko aangan me sab jama hote, fir lassi ya sharbat banta. Aur fir baahar khelne chale jaate. Kyuki gaanv me already kaafi uncha nicha hota hai, nadi pahaad khelna sabse best hota tha!
Fir jab andhera ghirne lagta, toh Sadashiv bhaiya laaltenein jalaate! Woh bhi ek interesting cheez hoti thi. Kaise woh pehele kaanch ko saaf karte, fir nayi batti lagate, tel daalte, aur ho jaati laalten ready!
Uske baad 7.30 tak ho jaata raat ka khana jise bundelkhandi me "biyaari" kehte hain. Bade babbaji roz dono time aadha litre doodh peete the; asli, ghar ka. Shayad isliye itne zaada strong the.
Fir hum sab chhat pe sone jaate(Bade babbaji aur nanaji niche hi soya karte aagan me). Puri chhat ko cover kiye hue hai ek vishalkaay neem ka ped. Raat me hawa chalti hai toh pattiyon ke hilne se pankhe, cooler, AC se zaada shaandaar hawa aati hai, aisa air condition kahan milega joh mosquito repellant bhi saath me laata ho! Kyuki neem ka ped tha, machchhar bhi nahi aate the. Waisi nind, aur kahin possible nahi hai. Khuli hawa me, chaad-taaron ko dekhte hue sone ka apna alag ek maza hota hai!
Bas ab un dinon ki yaadein hi reh gayin hain. Bade babbaji rahe nahi. Nani ko ab kuchh dikhai, sunai nahi deta. Nanaji bhi bimaar rehte hain. Aur hum sab ke paas ab waqt hi nahi bacha wahan jaane ka! :(
