main likhne betha ...qalam uthaya... kaghaz uthaya. kalam me siyaahi dekhi..aik lambi sans li aik fikra likha...
"khamosh insaan khamosh kiun hota hai? "
hota hai k baad sawaliyaa nishaan dala to qalam haath ko kaghaz se dooor kar gaya...aaj qalam me itni taqat dekhi k is sawal pe us ne likhne se rok diya...qalam ne aisa jhinjhora k dimagh soch he na paaya kuch...
or dekhte he dekhte main khamosh hogaya... qalam kaghaz par gir para ..aik aisay sipaahi ki tarha jo bari daleri se larta raha ho or aakhir me apna he gadhaar saathi apni bandoook ki goli ka nishana bana gaya...
main khaamosh hogaya...yeh nahi k dunya bhe khamosh hogayi the... sarak par gaariyo ki awazain , unki brako ki awaaaz or horn ki awaaaz abhi qaaayim the...khirki se hawa takraati or daz daz ki awaaz aanay lagti.paros me aik maa apne bigre huwe baitay ko samjhati the or beta cheekh cheekh kar apni maa ko rula raha tha..maa ki siskiyo ki awaaz or jawan nadaan bete ki jawani me madhoshi se nafarmaan awaaz aarhi the...
paao aik dum se khud hilnay laga tha ...or boot maiz ki taang se lag rha tha to thak thak thak ki awaaz numaya arahi the.lekan main khamosh tha ,or yeh awaazain ba-hayat hoty huwe bhe meri khamoshi me dafan hogayi...
phir main isi khamoshi me betha raha...waqt guzarta raha par main khamosh raha.
phir achay dino ki aik film chalne lagi jab lab muskurahat-zada rehte thay or dil kashada...
mera gaao aik chota sa gaao hai.daryaa-e-sindh k punjab se lagne walay kinaray se kuch
mile dooor.
gaao ki baat karu to gaao me hamwaar maidaan thay par zyada tar ooonchay neechay teelay thay mazboot matti kay...in teelo k ooper logo ne apne aashyaane sajaye basaye huwe thay.
makan kachay thay.par mohabbat se rishtay or imaan se qomiyat k ahsaas pukhta thay...
mere gaao ki abaadi me ziyad-tar ka taaluq fauj ya mehkama taleem se tha pr hai ...or ab to science k maidano me bhe gaao k log tehalne lagy hain...fauj or mehkama taleem dono he pur waqar or difaah k idaray thay...aik sarhado ki difaah par maaamoor tha or aik ikhlaaaq ki haddo ki difaah par...
Log achay thay.mehmaan-nawaz...zinda dil thay...ya yun kahuga dilo ko zinda rakh he lete thay.yeh ilaaaqa aanay waalay dino me aisay qaabil faazil paida karega jisay dunya bhar me jaana jayega...har mitti me zarkhezi hai par usay us khaas paani ki boond k intezaar hota hai jo ALLAH ki taraf se ho or wo boond mitti me aisay samaye k mitti roshan se roshan-tar hojae...mehak se aashna hojae...phir saalha zarkhezi uska muqadar bani rehti hai.or haan yaqeenan woh boond ALLAH ki rehmat or aadmi k paseenay ka nateeja hoti hai ... or main dekh sakta tha k yeh zarkhezi arhi the or yahan se moti nikal kar phailtay jarhay thay or jarhy hain..
is abaadi me aik umer raseeda bazurg khaatooon the... poora gaao un se waaaqif tha...sab kehte thay unka zehni tawazun theek nahi hai...par main unhy dekhta tha aik sawal liye huwe or haan us waqt meri umer lag bhag 9 saal bhe nahi hogi jab wo hamare ghar aya karti the...
chehra aisa jesay us ne apni poori zindagi ko lafzo me dhaal kar apne chehre par jhuriyo ki soorat me likh diya ho...ghor kiya jata to lambi lambi dastaanain thee usky chehre par...sir par dupatta huwa karta tha..or mathay par aik kapra bandha huwa tha..jesay gaao ki auratain sir dard se baandh leti hai ...bilkul waisa he...mujhe aisa lagta tha jesay us ne us kapre se bohat se khayaalo ko baandh rakha tha ..aisay khiyaal jin ki lagam hum se chooot chuki hai or hum ne dararain paida kar deen ahi...rishto me bhe... or ikhlaaaq me bhe...
wo ghar ati the jab hum sab naashta kar rahy hotay thay.. mazrat k saath naam batana main bhool gaya...unka naam bhe apne andar aik kahani rakhay huwe tha ...unka nam tha " MALKAANI" or hum unhe malkaani amma keh kar pukarte thay...jab wo naashtay k waqt aati the to meri phuppo chaae ka piyaala unky haath me thama deti.
malkaani amma k lab hiltay jesay unho ne bohat kuch keh diya or yeh bhe k jo main ne kaha wo dhoond lo...phir piyala uthati or bar'aamday me deewar se tek laga kar beth jaati...phuppo charpaai par bethnay ka bolti to wo zameen pe bethnay ko tarjeeh deti...jab piyalay me chaae itni reh jaati k bus aisa lagay k pata chal rha ho k is me chaae the... aik rang chaae kar nazar arha ho..tab wo aahista se uthti..chaae ka piyala phuppo ko pakraati or hont hilati ...jese mashkoor ho..uska shukriya ada karne ka yehi tareeka tha k hont hila diye phir apna haath hila kar chal di...main dekhta jata tha unko yeh sab karte huwe...woh aahista aahista qadam uthati or dooosre ghar ki taraf chali jaati...raastay me kapre ka koe tukra milta to utha leti...or phir agle ghar me jo pesh huwa wo kha pee leti or usi tarha hont hilati ,haath hilati chal parti...
raastay me kapra milta... ganda kapra,patha huwa kapra, daaghdaar kapra...par wo uthati...wo ganda kapra,patha huwa kapra,daaghdaar kapra...or wo nazro se door hojati ,jesay kaheen dooor jaa basi hon...
phir main jab gaaon me phir rha hota tha to meri nazar darakhto ki tehniyo pe parti jis pe wo kapre latak rahay hotay goya k unhe dhaanpa gaya ho...kabhi koe darakht..kabhi kisi k darwazay pe laga phata malkaani amma k chunay huwe kapro me lipta dikhaae deta...
pooray gaao me jahan bhe koe darakht ya darwazay ka phata kapro me malboos dikhaae deta to mujhe malkaani ama nazar anay lagti... or main poochta k wo kahan hai...phir wo ajati kabhi nashtay k time, kabhi dophar ko ...
main apni is khamoshi me yeh sab dekh rha tha.yeh sab film k manzar ki tarha wazeh chal rha tha meri aankho k saamne... phir achanak meri khamoshi toooti...ab k baar sab awaazain hoty huwe bhe qatal hogayi...unka wajood hotay huwe bhe wajood na raha...qalam phir hath me tha or kaghaz par qalam k chalne ki awaaz aanay lagi...baaqi awaazain qalam k kaghaz par chalnay ki awaaz me kaheen gum gayi...yeh awaaz kaghaz ki cheekh the or iski waja qalam se us me alfaaz ka piwast hona tha...
dekhte he dekhte malkaani amma ki daaastan likhna shuru hgaya...malkaani amma or usky kapro k cheethray...jo gaao k darjano darakhto par thay...or likhtay likhtay yeh khyal aaya.. malkaani ama k janay k 15 20 saal baad ... k malkaaani amma k janay k baad kisi darakht par koe tehni kapre me lipti nazar na aayi...koe shaakh aisi nazar na aayi jo kapre me dhappi huwee ho... phir unki tarha ki koe shaksiyat na aayi k jiski waja se gaao k sabhi ghar aik ghar ban gaye thay or malkaani amma sabhi gharo ka fard the..phir yeh bhe k uskay hiltay huway kamzor honto me kuch moti thay jo na mil saky kisi ko... malkaani amma ka tehniyo ko kapro se dhaanp dena aisa tha jesay wo is maaashray ko libaas derahi ho... or shayed yehi lafz thay jo malkaani amma k honto ko hila dete thay par awaaz ka saath na tha un lafzo ko or hum us waqt yeh na samajh sakay...
malkaani amma k janay k baad aaahista aaahista tehniyo se wo kapre utarne lagay...
or dekhte he dekhte kisi bhe tehni par koe kapra na raha...sab ki sab be-libaas hogayi...
mujhe aaj darkaht or unki tehniya mera apna gaao ,mera apna maashra ,mera apna mulk lagnay laga hai jo kuch saalo pehlay tak to libaas me tha or muqadas tha magar aaj be-libaas ho gaya... bel-libaas hogaya hai...khiyal se bhe or ikhlaaaq se bhe... kaash MALKAANI AMMA jesi koe shaksiyat he ho jo is maashray ko is mulk ko be-libas honay se bachaye...Kash MALKAANI AMMA jesi he koe hon jo khaamoshi se yeh kar jaain ... har shakhs libaas me nazar aaye..khiyaaal k libaas me ...ikhlaaaq k libaas me....
