Kyun Tumhe Kya Lagta Hai?

Iss baar ki baarish me wo baat nahi,
kuch sehme se lagte hain ye baadal..

Kyun tumhe kya lagta hai?



Pichle saawan me kuch kasak thi tujh me.
yaad hain na wo shaam jab yahi baadal kuch tassali se barse the,
iss baar kuch dare se lagte hain ye baadal,
thoda tu bhi dari si lagti hai...



Kyaa toot ke fate the pichli baar,jaise koi toofan le aenge..
kuch waisi hi aandhi kal shaam bhi aayi thi..
jaise kuch badalne ko betaab ho..
Mujhe laga tu izahaar karegi,
apne dil me basein armaano se jee bhar ke mujhe pyaar karegi.



Saari shaam taktaki lagaye baitha raha,
aasmaan me chaye ganhare badaalon ke beech,
luka chupi khelte taaron ko chunta raha...
Socha tu izhaar karegi,
iss raat ki baarish ki rimjhim sun kar thoda mujhse pyaar karegi..



Raat yun hi kat gyi, subah ki aad me kahin wo baadal ki kaalikh bhi chup gyi
izhaar ki ummeed ab utni hi feeki thi jitni saavan ki uss bochar ki...
Barse bhi to kuch aise ki naa baadal ko ehsaas hua
naa dharti ko...
mujhe to pata bhi na chala kab baras ke ruk pade..

Kyun tumhe kya lagta hai?

Kab tak yun dar dar ke jeeyenge..
kab tak yun mar mar ke jeeyenge..
tootane ko betaab ye baandh bhi ik baarish ke intezaar me hain,
mere faili baahein bhi bus tere izhaar ko bekarar hain..

wo ahat iss baar shayad naa hogi, kuch yun lagta hai mujhe,
wo baarish ki atthas bhari bochar iss baar na hogi..
iss baar kuch sehme se lagte hain sab...

Kyun tumhe kya lagta hai?