Uski yaadon se nikle toh kavita likhna hi bhool chuke the,
Itna ki apne andar ka lekhak kisi puraane aziz ki tarah ab yaad aata hai bohot.
Likhne baith jaaun abhi toh hoga fir,
Wahi shoonya, wahi sannata, wahi andhera.
Na likhun toh apne astitva ke kho jaane ka darr.
Kalaatmakta ke abhaav me chhaa jaane waali neerasta.
Ekdam se uddeshyaviheen ho jaane ki kuntha.
Uske saath jeena mumkin nahi tha.
Uske bagair, uski yaadon ko dafan karke jiyun toh khudko khatm hote dekhti hun.
Khudko zinda rakhne ke liye uski yaadon ko saath rakhna zaroori hai.
Ek lekhak ki majboori hai.
Aaj ekaaek iss baat pe dhyaan gaya toh prateet hua,
Ki jaise kahin gum ho rahi hai meri pehchaan,
Ki jaise khatm ho rahi hun main.
Aatma sihar gayi.
Mann ashaant hua.
Toh kya yeh kavita kisi vivashta ka parinaam hai?
Fir ekdam se bijli ki tarah kaundh gaya dimaag me yeh vichaar,
Kya main ab bhi bachi hun? Kya yeh ek kavita hai?
