Jalti hui chilam dekhi hai unhone kitni hi baar
fir bhi kehte hain aap kaun, apko pehle kabhi nahi dekha
dhalta hua suraj dekha hai kitnni hi haseen shaamon me
fir bhi jab main saamne jaata hu to pehchaan nahi paati mujhe
un lehron se jalta hu main mana
kyun na jaloon wo aksar unke tan ko jo chu leti hai
kaise bataun
inhi lehron me har shaam doob jaata hu main
pyaar karti hain ye aankhen mujhe bus yahi ummed hai mere dil me
jo har subah fir laut aata hu
har roj fir jal jaata hu
Kaise jagayein unhe neend se jo naata tode baithe hain....
baithe hain ek kone me sir chupaaaye
wo kona bhi mere dil ka hi hai kaise unhe batayein
Pata nahi kyun wo dil me khaamoshiyaan le ke baithe hain...
unki khaamoshi se meri duniya me bhi ab sannata hai
Na bolne ki kasamein khaayi ho jaise muh kuch iss tarah see liya hai...
par shayad usse ye nahi pata
ham bhi uske bolne ke intezaar tak jeete rehne ki kasamein khaaye baithe hai
Wo to chale gye bus pairo ke nishaan reh gye...
kuch yaadein kuch aahatein...
kuch saath jiye pal..kuch muskurahatein...
har lamha jaise unki yaadon ki chasni me bheega ho...
har lamha jaise thoda khatta thoda meetha ho...
ek annsu ke qatra aankon me
aur ek shararat bhari muskurahat aati hai in hothon par...
jab wo nishaan mitate hue
aur wo kadam meri aur badhte hue dikhte hain..
fir wo ahatein jeene ki umang
wo chahtein karne ka junoon laut aata hai...
dekho wo unke kadam fir meri or badh aaye hain
Usne bhi badi shiddat se tarasha hai iss duniya ko,
kabhi hum iss kudrat ki ada ko dekhte hain
to kabhi aapke chehre ko...
par naa jaane ye dil kabakht bharta hi nahi.
Kal raat ek sapna aaya tha
aankhen band thi to saanso ke raste dil me sama gya,
kuch yaad to nahi puri tarah, har sapne ki tarah.
sapne me bench par baithe,
do adhed haathon ki lakeerien yaad hain,
unpe wo rengti jhuriyaan yaad hai..
ek haath tera bhitha unme,
ek kuch meri lakeeron se milta tha.
saanjh ko ussi kaursi pe khudko tere sath baitha paya,
andhera kuch udaas sa tha
par teri aankhon me bhi uss sapne ki chamak dikh rahi thi
Pus ki raaton me badan jab kanpkapaane lagta hai,
to uss alaav ke kareeb baith jaata hu..
uski garmi ka kambal jab odhne lagta hu,
to lagta hai jaise hawaaon me ab tu aa basi ho
Ye pyaar bhi ajab hai na....
jharte tootate, tehni se bichadte patte ko hi dekh lo..
mad mast sa lehrata hua girta hai...
jameen ki sachchai bhi uska nasha choor naa kar
paayi ho jaise.
Kabhi koi kehta hai main shayar ho gya hu,
to kabhi mujhe kavi keh dete hain..
sab tera hi to kasoor hai to...
tu hi to hai jo aksar panno me utar aati hai
aur logon ko lagta hai ye meri karigari hai...
