Youngistan ! Sun ne me bada accha lagta hai na !! Par, jab koi kehta hai ki tumhare haath me hai desh ka aane waala kal,toh kabhi koi seriously lete hain aur kabhi koi khilli me uda dete hain. Kyun karte hain aisa hum ?
Kai logon se khud maine pucha hai aur jawab me aksar ek baat sun ne ko mili hai mujhe "Hum abhi taiyar thode hi hain itna serious responsibility lene k liye ?"
Accha lagta hai ye jaan kar ki aaj ki yuva peedhi ko aakhir itna toh pata hai ki,desh ki seva karne me serious responsibility hoti hai. Bolte hain,border pe ladhne ki himmat nahi hoti. Soch hi k darr lagta hai. Par inko kaun samjhaye ki sirf border pe khade ho kar videshi logon ko seema paar karne se rokna hi desh ke kal ko surakshit karna nahi hota.
Desh ka har ek yuva agar soch lega ki jyada kuch nahi,bas khudko galat raaste pe chalne se rok le na,toh hamara Bharat atleast 50% surakshit toh ho hi jaega. Bina koi khaas mehnat ke. Mai khud 20 saal ki hun. Aur aaj ye sab bakwaas issiliye kar rahi hun,kyunki finally maine apni aankhein khol li,aur maine dekha,ki bada hi asaan hota hai sach ka saath dena. Hum hamesha sochte hain ki buri aadat jaldi lagti hai aur sudhaarne me jyada waqt lagta hai. Par try kar k dekhiyo. Utna bhi jyada time nahi lagta agar sache mann se try karo toh..
Hamare paas buddhi hai,taqat hai,zajba hai kuch karne ka. Itna toh har kisisme hota hai,pakka se. Bas usko istemaal kis disha kar rahe ho,wo important hota hai.
Hamare class me ek stud sa ladka hai. ussi ka example lete hain. Aise toh kaafi haankta phirta hai. Koi usski baat na maane toh maar pit pe utar aata hai. Par kal college ke bahar ek ladki ko kai log chhed rahe the,toh ye banda help k liye aas paas tak nahi gaya. Toh phir body-shody banaya hi kyun tha ? Doston ko dominate karne aur ladki patane k liye ? Waah bhai waah. Ye hai aaj ki yuva-peedhi.
Hamare class me ek aur banda hai,infact ek bandi bhi. Dono ka common problem ye hai ki unka saamaan koi bhi touch kare ya unke doston k baareme koi kuch bura bole toh dono gusse se laal-peele ho jaate hain. Aur phir jo bhaasan shuru hota hai unka,pura ka pura A grade movie ka dialogue lagta hai. Gaali toh gaali upar se volume unka kuch aisa rehta hai ki do chaar agal bagal k class tak sunai de.
Par ye log bhi kal college k baahar the,jab uss ladki ko cheeda jaa raha tha. Wo dekh k inn logon ko gussa nahi aaya. Araam sa apne coke ka mazaa le rahe the. Bhai,channelize karo apne anger ko . Gussa karna hamesha buri baat nahi hoti, agar sahi maaine me usska istemaal karo toh. Ye hai dusra namuna aaj k yuva-peedhi ka.
Ek aur ladki ka case lete hain. Ye hamesha dealing deti hai ki mai desh bhakt hun. Mujhe desh k liye kuch karna hai. Par kisise ek chocolate tak share nahi karti. Apne alawa kisi aur k liye kuch bhi nahi karti,sochti tak nahi. Aise insaan se kya ummeed hogi hamari ? Sirf bolne se kuch ho jaega accha desh ka ??
Ab mere crush k baareme discuss karte hain. Bada intelligent banda hai. Debate wagera jeetna usske liye chutki bajane jitna easy hota hai. Aap usse kisiko bhi kisi cheez k liye convince karne bol do bas,samjho ki aapka kaam ho gaya. Har ek student,har ek teacher aur yahan tak ki college k chairman bhi usko pasand karte hain. Mai hamesha usko bolti hun ki future me politics join kar liyo. Aur banda maan bhi jaata hai. Koi toh hai jo apni khubi ko desh k liye istemaal karne ko raazi hai. Tabhi toh mera crush hai wo :P
Ab chaliye mai aapko apne baareme batati hun. Normal si ladki hun. Kuch extra-ordinary cheez dena hi bhul gaye mujhe Bhagwaan. Par koi nahi,moti hun kaafi. Toh agar darana chahun toh thode se log dar jaate hain kabhi kabhi :D. Haan toh mai bol rahi thi na aapse ki maine finally apni aakhein khol li. Wo iss wajah se kyunki kal coleege k bahaar unn mahaan aatmaon ne kuch kiya toh nahi,par maine uss ladki ko bacha liya. Ab sochiyega ki kaise ? Rukiye,batati hun.
Haan toh bakery k saamne uss ladki ko chheda jaa raha tha. Aur mai as-usual khane ka samaan kharidne gayi hui thi. Jab dhyan utha khnae se toh dekha maine ki 3 launde mil kar ek ladki ko chhed rahe hain aur wo ladki almost rone ko hai. Toh maine jaldi se apna samaan kharida aur phir,steps se utarte waqt jaan bujh kar lad-khada gayi mai. Aur kuch aise angle me giri ki unn teeno me se 2 lgon ko saath me lekar giri. Mera mazaak toh uda hi par unn logon ka bhi mazaak udane lage log. Toh sharam k maare teeno nikal liye wahan se patli gali se.
Baad me pata chala ki wo log normal se launde nahi the. Area k bade gunde the. Jaan ne k baad phati meri thodi si. Par iss baat ka darr nahi tha ki wo log mujhe kuch karenge,kyunki unn logon ne dhang se mera chehra tak nahi dekha tha. Jo bhi ho,end product ye tha ki wo ladki bach gayi. Ussne aa kar thank you bhi bola mujhe. Ek choco-pie khilaya mereko. Aur kya chahiye :P Hehe :D
Dil se khushi mili mujhe kal. Hum log apne chhote se duniya se nikal kar jab apne poore desh k baareme sochne lagenge na,aur kuch accha karenge kisi anjaan k liye,toh uss waqt jo khushi milti hai..wo kuch alag hi hoti hai. Padhai me top karte ho,toh Abroad mat jao settle hone. India me kaafi zaroorat hai scholars ki. Har field me. Serve your country in your own way. Jitna kar sakte ho.
Kholo apni aakhein yaaron. Nashe me dube mat raho. Hosh me aao. Poora desh tumhara saath dega,ek baar pukaar ke toh dekho. Sahi raaste par ek kadam badha kar toh dekho. Humraahi mil hi jaenge. Safar tay karo toh sahi,manzil mil hi jaegi.
Kholo apni aakhein yaaron.. .. ..
