Bas aaj khaali samay me yunhi,
Purani kitaabein jamaane me lag gayi..
Yeh socha nahi doob jaungi fir se usi samandar me,
Unse yaadon ki jami dhool hataane me lag gayi.
Ek k baad ek Shakespeare, Krishen Chander, Austen aur Parsaai ka silsila tha.
Har ek se judi kisi yaad se aaj bade dinon baad kuchh waqt khudke liye mila tha.
Ab nazar gayi "Wuthering Heights" pe,
Uska ek panna andar ki or muda tha.
Kholkar dekha toh us panne pe ek pata likha tha.
Aaj maloom hua ki 10 saal se yeh kitaab nahi khuli.
Aur unhi 10 saalon me dunia kitni badal gai!
Tumse yunhi baaton baaton me,
Tumhare ghar ka pata puchh lia tha.
Kitaab ka joh panna padh rahi thi,
Usi pe likh liya tha.
(uske niche chhota sa ek dil bana dia tha)
Baaton baaton me humne ek dusre k saath,
Ek sapna dekh lia tha.
Zindagi bhar saath rehne ka ek dusre se,
Ek waada kar dia tha.
Saari dunia se pare,
Naya sansaar bana lia tha.
Fir ek aandhi ke aa jaane se,
Woh sab kuchh ujad gaya tha.
Hum saath me hote toh dunia alag hoti.
Tum ruk jaate toh khushiyaan alag hoti.
Main zindagi se kuchh zara maayus si hun ab,
Tum hote toh baagon me kuchh kaliyaan alag hoti.
Kuchh alag rang hota unka, kuchh alag hi mehek hoti.
Kuchh alag dhang hota, panchhiyon ki alag chehek hoti.
Phone baja toh mehsus hua ki meri saans thami thi.
Kahin ek tees si uthi thi andar, aankhon me nami thi.
Us kitaab ko band karke wapas shelf me rakh dia.
Zamane se band taale ki chaabhi k samaan hai yeh band kitaab ka panna,
Use fir se usi tarah kaske band kar dia.
