Kitni ajeeb baat hai na,
Jab tu mere paas thi,
To har dam ye sochta tha ki ,
Kya mai teri kadar nahi karta......
Aur aaj jab tu mere paas nahi,
To ye ehsaas hota hai,
Ki Kadar to humesha se hi thi,
Par tujhe na khone ke yakeen ne,
Mujhe andha bana diya tha.....
Bhala kya pata tha,
Ki aisa bhi kuch ho sakta hai,
Mera tujhse alag hona,
Utna hi namumkin tha,
Jitna tera mujhse nafrat karna,
Baitha hoon thandi zameen par,
Aankho me wo teri,
Ek dimple wali pyaari si hasi,
Haath me, teri ek tasveer hai,
Jise dekh kar har dum,
Mai tere chehre pe aane wale baal,
Tere kaano k peeche laga deta hoon...
"Tujhe bahut tang karte hai na"..
Mobile mein Fake Call pe tera naam daal diya hai,
Shuru karke khush ho jata hoon...
Aur jab aas paas koi nahi hota,
To mann behlane ke liye do chaar baanten bhi kar leta hoon..
Tere jawab to mujhe pata hi hote hai na...
Teri payal ab mere haathon mein bandhi rehti hai,
Ekdum waisi hi,
Haan bas uske ghungroo zaroor nikaal liye hai,
Taaki teri maujudgi ka yakeen to ho,
Par ehsaas nahi...
Tum sulati thi to so jata tha,
Ab tum nahi sulati to aisa lagta hai,
Jaise meri neend hi so gayi hai,
Wo meri pyaari si bachchi,
Bheed mein kahi kho gayi hai...
Yaad aati hai wo gali mujhe,
Jahan main aaya karta tha,
Khud coffee shop mein khade hokar,
Tujhe balcony mein bulaya karta tha..
Gali to aaj bhi wahi hai, Dukaane bhi wahi hai,
Bas bheed bahut ho gayi hai uss gali mein,
Mere liye ab zara si bhi jagah nahi hai...
Tu ye na sochna ki ye bhi hai ek koshish...
Tu kabhi nahi aa sakti wapas zindagi me meri...
Par bhula na paunga wo pyaari si yaaden teri...
Shayad iss chote se dil ke liye, tu bahut badi ho gayi hai...
Shayad ek pyaar ke saagar mein, kuch boondo ki kami ho gayi hai...
Leta hoon ab ek aakhri alvida tujhse..
Karta hoon ab is choti si kahani ka pyaara sa annt...
Khush rehna tu humesha, Khushiyan mile tujhe annant...
Jaa Teri Nazron Se Ab Maine Mooh Mod Liya......
Teri Khushi Ke Liye, Ab Maine Tujhe Hi Chhod Diya.......
