Beh rahi hai zindagi ek raftaar se
Rukne ko kaho to bura maan jaati hai
Wo khamosh si hai jabse jaana hai usko
Jo mili thi mujhe yun raah chalte
Ek maraasim sa ban gaya hai uske saath
Wo hasaati hai main hasta hoon
Wo kehti hai main sunta hoon
Main sochta hoon kahoon kuch apni
Par sab to dard ke qisse hain
Main hoon us dard ki naav pe
Mujhe bahaaye le jaa rahi hai zindagi
Kuch sapne adhoore chhod aaya hoon
Ae zindagi unka zara khyaal rakhna
Sochta hoon zindagi na hoti to kya hota
Na main hi hota na dard ye hota
Na khushiyon ki chaahat ki aahat hi hoti
Dard mein jeene ki rivaayat hi hoti
Koi hota apna, sab keh sakta jisse
Zindagi to kuch door saath dekar chali jaayegi
Phir kya kabhi wo saath nibhaayegi?
Kinaare pe pahuch gaya hoon ab
Dheeme dheeme khaamosh kadmon se
Le aaya hoon khud ko doosri ore
Palat ke dekha to koi nahin tha wahaan
Na hi dard ki naav thi aur na hi behti zindagi
