Computer ko ektak dekhne se aankhein jal rahi thi.
Toh ek pal ko palat ke khidki ke kaanch se baahar dekha.
Ek latt kaano ke pichhe se fisal kar chehre pe aa gayi thi.
Haatho ki susti ne use hataane k khayal ko ekdam nakaar diya!
Ab uss latt ke uss paar tumhara chehra dikha,
Aur bas kahin se ek furti si aa gayi rom-rom me!
Fauran hi uthkar kapde thik kiye,
Phone ki locked screen pe chehra dekha aur wapas palatkar dekha.
Koi nahi tha....
Shayad maine der kar di, aur tum chale gaye.
Nirasha ki gehri saans li aur wapas kaam karne lagi.
Fir kuchh der baad woh latt fir se fisal ke chehre pe aa gayi.
Aur anaayaas hi khidki se baahar dekh liya...
Aur tum wahin khade the! Muskurate huye!
Fir latt hatayi, aur tum nahi the...
Tum the yaa nahi?
Latt ke iss paar se dikhte ho, uss paar se nahi!
Yeh kaisa khel hai?
Yaa sach apne astitva ki abhivyakti iss khel se kar raha hai?
Tum the yaa nahi?
Kya Prem se bune sansaar aur sach ke bich me aisi hi koi baalon ki latt hai?
Jiske iss paar se tum dikhte zaroor ho, par uss paar tum waakai me nahi ho?
Tum the yaa nahi?
Tum ho yaa nahi?

Sign In to know Author